الجمعة ، 20 يوليو 2018
الرئيسية / تدوينات / تدوينات تونسية / زمن الدغف والاستدغاف

زمن الدغف والاستدغاف

نور الدين العويديدي

العامة ناس مساكن، وكلنا في هذا الزمن عامة.. كلنا دغف، يكعبروهالنا ويضحكوا علينا، واحنا حالين افامنا ونظن اللي احنا أذكياء وفايقين وفاهمين الدنيا والدين..

عبد الكريم العبيدي رئيس فرقة حماية الطائرات قال البارح في قناة “آم تونيزيا” اللي هو شد 7 فاليجات مهربة لدبي، في كل فاليجة 3 ملايين يورو.. يعني بالقليلة فيهم 60 مليون دينار.

آش وصل لينا نحن العامة والدهماء.. وصل لينا اللي هو تابع النهضة، وأنو مشارك في عمليات التسفير وفي استقبال الدعاة.. وبهاك الحجة دكوه في الحبس قداش من شهر، ونحوه م البلاصة باش يهربوا وهوما مرتاحين.

العبيدي قال إنو مدير الديوانة خبرو أنه يجي عشرة عمليات متاع فاليجات أخرى تعدت قبل.. وقال إنها تتعدى بحجة أنها داخلة من الجزائر، وعندها أوراق تثبت ذلك، وطبعا أوراق مزورة، وبالتالي يحق لصاحبها أنو يخرجها بشكل قانوني..

قال قلت لصاحب الفاليجات مانيش باش نعديك.. وباش نردك للجزائر أنت وفاليجاتك.. قال اللي هو ترعب وقال لي: خوذهم الفلوس وما ترجعنيش.

العبيدي قال إنو السيد عندو شركاء توانسة.. وأن الشركاء مصورين بكاميراوات المطار.. لكن شكون منكم سمع اللي واحد منهم تشد؟ ولا واحد عندو معلومة بكل تأكيد.

والشعب المسكين يصدق أنو العبيدي وغيرو متورطين في تسفير الإرهابيين.. وقداش من ذنوب وسرقات وتهريب أموال ركبت على ظهورنا وظهور الإرهابيين أولاد الكلب.. هاذم ضارينا طول وعرض وفي الطالع وفي النازل ياكلوا في لحمنا.. ضارينا بالإرهاب المجنون متاعهم وضارينا بالجرايم اللي تتقى بيهم.. وياما فيك يا تونس من غرايب وعجايب.

شاهد أيضاً

شهادة للتاريخ…

نور الدين الغيلوفي على هامش تقرير لجنة الحريات الفردية والمساواة.. هذه شهادة منّي تتعلّق بالدكتور ...

اترك رد