موش معقدين كيما الكعبتين الي عندنا
بما اني مڤرب هالايامات عديت نهاري كامل نتفرج في القناة الفرنسية TV5 الي عاملة برنامج ضخم من اكثر من خمسة ساعات على التحضيرات لاحتفالات اخر السنة في مختلف المناطق في فرنسا من شجرة السابان واماكن انتاجها لزينتها للڤاتوات والماكولات وتجهيز الطاولة والأصول الدينية والتاريخية لكل تفاصيل الاحتفالات واعطاو الكلمة لعشرات المتدخلين في مختلف المجالات الي حكاو على رمزية الاحتفالات هاذي واهميتها للحفاظ على الهوية وللترابط العائلي…
أكثر من 60% من الفرنسيين ملحدين ولكن ولا واحد قالك عادات بربرية لا تمثلنا ويجب القضاء عليها خاطرهم ملحدين واما موش معقدين من كل ما له علاقة بالدين كيما الكعبتين الي عندنا والي في كل عيد والا مولد يستحوذو على كل المنابر باش يسيبو علينا العقد المرضية متاعهم.
5 ساعات من مظاهر الفرح والبهجة لا قالك سوم شجرة السابان غالي ولا قالك الزوالي ماعادش يلحق على الداندون ولا قالك موش معقول الكافيار ما ينجمو يشريوه كان الي لاباس عليهم…
علاخاطر الاعلام الفرنسي متاع ناس تعرف تفرح وتعرف شمعناها لكل مقام مقال وتعرف انو الحفاظ على معنويات مرتفعة من اهم اسباب نجاح الشعوب موش كيف الي عندنا في كل عيد يعملولنا ندابة ويمرروهالنا.