الأحد ، 19 نوفمبر 2017
الرئيسية / تدوينات / تدوينات تونسية / نبيل القروي وأسلحة الخداع الشامل وسرقة الإنتخابات

نبيل القروي وأسلحة الخداع الشامل وسرقة الإنتخابات

وائل زميت

بعد التسريب الاخير لنبيل القروي، و الي بالنسبة لي ما فيه حتى شي جديد إلا انو اكد وقائع او ذكر بيها… ونحب نبشر وخيانا انو حتى الانتخابات الجاية نفس الهم مش يتواصل.

التلخيص في كلمتين: نبيل القروي يفتخر انو من اهم صانعي المشهد السياسي وصانعي الاحزاب والرؤساء… وصل السبسي للقصر بل و”لبسو الروبة (متع المحاماة)… قال في حكاية محاكمته، جبتهم الكل ومشيتلهم بالواحد، يا اما تاقف معايا ولا نحرقك… والكلهم مشاو في الخط كان المحروق بطبعه الشابي…

ايا نعاود نفس الكلام الي نقول فيه من 2011… يقول الي بناء على إحصائيات، نسبة تاثير التلفاز في اختيار المرشح للتصويت تبلغ 65%، مقابل 6% قدام آك “الواع واع” متع فايسبوك والانترنيت… وهذا كلام حسب رايي صحيح واكثر من صحيح… فايسبوك قاعدين كان نتجوعبوا على بعضنا ونفرقوا في الجامات ونعلقوا عند حبايبنا الي ديجا 90% منهم نتشاركوا في نفس المواقف…

آك العام، في امريكا كتب احد الكتاب والصحفيين، هناك نوعان من WMDs:

* WMD= Weapons of Mass Destruction: اسلحة الدمار الشامل، والكل نعرفوا قدرتهم التدميرية وخطرهم.

وفما

* WMD= Weapons of Mass Deception: اسلحة الخداع الشامل، كيما Fox News وCNN و nbc و msnbc… وهاذم اخطر بمرات من وسائل الدمار الشامل…

بنفس المنطق نعاود نكرر نسمة، الحوار التونسي والتاسعة… نبيل القروي وسامي الفهري وبن غربية… برهان بسيس، مريم بلقاضي، الفبروكي، بوغلاب والطحان الاكبر لطفي العماري يمثلوا وسائل دمار شامل والمرتزقة هاذم اخطر ما فما على البلاد هاذي والشان العام…

في تونس، الانتخابات مازالت تتسرق وتتزور. قبل كانوا يزوروا صناديق الاقتراع. اليوم، يتم تزوير وعي الناخب قبل الاقتراع… اليوم قناة تلفزية تصنع حزب وتطلع رؤساء وبرامج تلفزية تدمر احزاب وتقتل سياسيين.. وسيتواصل هذا العار…

للمرة 87439840، لا مجال انو الواقع السياسي في تونس يتغير بنفس المشهد الاعلامي… والله لو كان تصنعوا اعظم حزب وتلموا فيه اقوى سياسيين وتهبطوا معاكم جورج واشنطن وابراهام لينكون وتجيبوا اوباما يكتب الخطابات، ما عندكش اعلام، ما عندكش حتى مستقبل سياسي…

يا شعبنا السمح، الاعلام لا ينقل الواقع… الاعلام يصنع الواقع…

2 ملاحظات:

ما عنديش تلفزة وعمري ما اقتنعت بنجاعة فكرة مقاطعة الاعلام…
عموم شعبنا السمح ما سمعش وماهوش مش يسمع بالتسريبات…

#سنحاربهم_بقناة_الزيتونة_و_mtv_والاعلام_البديل
#زيد_شيخ_علينا_في_2019_يا_سي_نبيل
#مازالوا_مش_يهزوا_الانتخابات_الجاية
#القادم_اتعس
رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا
رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُون

شاهد أيضاً

حين رأى خوفي واضطرابي

عبد اللطيف علوي حين رأى خوفي واضطرابي، أحسّ أنّها الفرصة المناسبة لاقتناص فريسته، قال لي ...

اترك رد