الجمعة , 14 ديسمبر 2018
الرئيسية / تدوينات تونسية / يوميات مواطن

يوميات مواطن

وائل زميت
شنية اكبر الانجازات بالنسبة لشخص تونسي؟
الجواب: يروح من الخدمة في نفس النهار
الواحد كمل الخدمة العشرة متع الصباح (والساك متعو حاضرة)… وصل لدارهم الثمانية ونص متع الليل… 300 كم في 10 سوايع، يعني كان شخص مروح من الصين وعمل اسكال في دبي راهو وصل قبلي…
واليكم رحلة اليوم:
نقل: بودرياس – السبالة
كار: السبالة – رومبوان الحرس
كار: رومبوان الحرس – فوسانة
(هاذم 20 كم نورمالمون في نقل واحد، اليوم تبارك الله كل 5 كم نبدلوا وسيلة النقل)
لواج: فوسانة – القصرين
لواج: القصرين – سوسة
لواج: سوسة – براكة الساحل
تاكسي جماعي: براكة الساحل – نابل
تاكسي: نابل – بني خيار
حاصيلو تسمع فيديو بساعة، ويهزك النوم وتقرا طرف ارتيكلوات، ويوجعك راسك، وترقد، وتبرا، وتسمع الراديو، وتدور في فيسبوك، ويعاود يوجعك راسك، وتتذكر حكاية صارت عام 2000، وتسرح في ملكوت ربي، وتسمع فيديو اخرى بساعة، ويطيح التاليفون من الشارج، وترقد، وتفيق تزيد تتاكد من النظرية الي تقول انو اللواجسية ما يعرفوش يسوقوا… هذا الكل يصير تاخو تشوف تلقى مازالك اربعة سوايع نقل في ربوع تونس الخضراء…
اك العام توفيق الحكيم خرج كتاب “يوميات نائب في الارياف”… وانا قاعد نخمم نكتب كتاب “يوميات يائس تونسي في “دولة” طبقية كلبتوقراطية ظالمة”.
#تونسالفينوسبعطاش
#300كم
في10سوايع
#تمتترقيتيمناستاذإلىرحّالةفوقالرتبة
#العام
الجاينقريوبالطابلات
رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا
رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُون

شاهد أيضاً

السبسي: “إغلقي عينيك وفكري في إنجلترا”

وائل زميت في أواخر السبعينات، عُرضت في لندن مسرحية بعنوان: Shut Your Eyes and Think ...

كنت في الرقة: هارب من الدولة الإسلامية

وائل زميت هذا عنوان كتاب خرج قبل ايام، من اصدار دار نقوش عربية… للكاتب والصحفي ...