امشي المرّة هاذي لطبيب معروف !!!
حليمة معالج
غريبة جديدة
بما اني ديما بغرايبي وبعجايبي باش نتحفكم بآخر غريبة، ولكنها موش أي غريبة..؟!
شدو عندكم.
هالمدّة وجعتني عينيا شوية، جيت باش نمشي لطبيب معروف، قلت سيّب عليا، آخي خويا اشكون حطملو حياتو غير الطبة المعروفين، الهنتاتي وما أدراك مالهنتاتي،
هزيت التلفون وطلبت الـ 1200، اعطاتني زوز والا ثلاثة اسماء اطباء عينين مشيت لاسهل اسم فيهم.
بعد ما عدالي الطبيب على عيني، غزرلي وقلّي مدام عندك الضغط في عينيك، عينيك فيها الماء الأزرق، ويلزمك تبدا تاخو ما يسمى في لغة (الكلوكوم) بالقطرة.
روّحت للدار،
حكيت الحكاية لمولى بيتي كيما تقول أمي، قلّي مانا خاسرين شيء، وبرا امشي المرّة هاذي لطبيب معروف وديما رايين خير من راي.
وهكاكة كان العمل، هزيت روحي مكرهة ومشيت لطبيب معروف، اسمو يلعلع، وعيادتو في اللاك وما أدراك ما اللاك،
عمل سي الطبيب جولة في عينيا، وقبل ما يقبض قلي شوف يا مدام عينيك الزوز فيهم الماء الأبيض “الكاتراكت” ويلزمك تعمل عمليتين وتبدّل العدستين،
قتلو اشنوة المطلوب..؟
قلّي نعملو راديو والا اندرا اشنوة، وناخذو القياسات متاع العدسة ونتوكلو على ربي،
ما كنتش من العاكسين، وقتلو على الضالين آمين،
عمرلي سي الطبيب الأوراق الكل، وحضرلي ملف الكنام وتنجمو تقولو تفاهمنا حتى على الموعد.
روّحت وكالعادة حكيت الحكاية لمولا بيتي، اللي المرة هاذي تضرب جاء يدور، وقلّي اشنوة هالهدرة..؟ واحد دمو ازرق والاخر دمو ابيض، وطلب مني باش نتريث وما نعمل حتى شيء في انتظار رأي ثالث.
محمد راجلي عندو صاحبو بيطري خوه طبيب عينين معروف برشة، والموعد معاه بالشهر وان شاء الله، وانا ما نحبش التدخلات.
المفيد المرة هاذي تصرفنا كيما التوانسة الكل، واليوم كان لي موعد مع الطبيب هذا في مصحة العيون في حي الخضراء. دخلت للطبيب وبعد ما شافلي عيني قلّي اطلع للدكتورة حتيرة الفوق تزيد تتأكدلي، عندك أعراض كسل في العضلات متاع العين، طلعت للدكتورة حتيرة، عملت التصويرة وفمة اختبار يعملوه عملتو زادة، تأكدت هي من خلالهم اللي أنا عندي “insuffisance de convergence” فهمتني اشنوة المطلوب ورجعت لطبيب العينين، بدا الطبيب يفسرلي في الحالة متاعي حسب التصاور، وهو يتكلّم وانا نستنى في لون الماء اللي باش ينطق بيه، ولكن لا حياة لمن تنادي،
وقت حسيت اللي وقت الفحص متاعي اوشك على النهاية، سئلتو وقتلو دكتور و”الكاتاراكت والكلوكوم” اشنوة باش نعملو فيهم..؟
فيسع هز راسو وقلّي أما كاتراكت وأما غلوكوم..؟
نظرك بسم الله ما شاء الله 10/10 عندك شوية كسل في العضلات يلزمو يتقوّم لا اكثر ولا اقل،
قتلو زملائك هوما اللي قالولي، وانا جيتك لرأي ثالث،
من الغصرة الراجل قلّي زيد عاود اقعد رغم انه متأكد من تشخيصه، وحسيتو موش مصدقني.
هز راسو وقلّي مدام امشي اعمل حصص التقويم متاعك وانسى حكاية المياه جملة، وعلى مسؤوليتي.
بصراحة هو ما سألنيش على أسماء الأطباء، وما قال حتى شيء عليهم، وانا الحمد لله ما زلقت بحتى اسم، ولكن في المقابل خفت لا ما يصدقنيش،
ومباشرة بعدما خرجت، هزيت التلفون وكلمت خوه البيطري زميل زوجي وحكيتلو الحكاية، واعطيتو اسم الطبيب الثاني المعروف اللي حضّرلي حتى ملف العمليتين، وقتلو كان خوك يحب يتأكد راني مستعدة نعطيه الملف، ودوب ما سمع محدثي باسم الطبيب ما صدّقش روحو.
وانا بهالمناسبة نحب نقول للأطباء خافوا ربي في مرضاكم.
خافوا ربي في صحتنا راهي أمانة بين يديكم.
وان شاء الله الصديق ماهر العباسي ما يتغشش المرة هاذي زادة.