السبت ، 18 نوفمبر 2017
الرئيسية / تدوينات / مقالات / وَمَا قَدَرُوا اللَّهَ حَقَّ قَدْرِهِ

وَمَا قَدَرُوا اللَّهَ حَقَّ قَدْرِهِ

الحبيب حمام

الحلقة الثالثة: عندو ليماناظا بنينة. بالشفاء ليك. البارحة نتفرج في مدرسة المشاغبين، مت بالضحك على سعيد صالح وهو يقول “يتمرمر بالحرورة وينكمش بالبرورة”، شيقصد؟ هو يتحدث على قانون فيزيائي يقول “الأجسام تتمدد بالحرارة وتنكمش بالبرودة”، يعني لو تأخذ قطعة حديد، وتسخنها بالنار، تتمدد، يعني يزيد حجمها (volume) مع المحافظة على كتلتها (mass, masse)، وبالتالي تنخفض كثافتها (density, densité). ولذلك ترى السكك الحديدية متقطعة بفجوات كل بضعة عشرات الأمتار بسنتيميتر أو أقل. هذا يسمح للحديد أن يتمطّط في الصيف دون أن يتقوّس فيخرج القطار عن مساره. سبحان الله، خلق ربي منظم، مريڨل حسب قوانين، ما فماش استثناآت كيما القوانين متاعنا في تونس، هذا يتعدى فلاش باستثناء، تالفون يعني، ولاخر يطبقوا عليه القانون مع شويه زيادة في التطبيق. كلامك شطرو صحيح. شنوّه اللي فيه غالط؟ اللي حكيتو على العوج في تونس وتكسير كرايم القانون صحيح، أما أن ربي موش عامل استثناآت، موش صحيح.

دوختني، ثمّه تاليفونات مع ربي؟ ثمّه. بالله، اعطيني الرقم، عندي جاري مغلب عليّ، البارح يقلي في السردينة وحالل الشبابك، خلاني نفغم، خليني نصفي لو حسابو عند ربي. هاك الرقم: 2 2 4 4 3 4 2 1. قداش الانديكاتيف؟ الوضوء. نعم؟ يعني تتوضّى وتصلي الركعات اللي قتلك عليها، وتكلم ربي مباشرة، عندك نهار كامل من صلاة الفجر حتى للوتر، أما ماذا بيك ما تجيبش سيرة جارك والسردينة، وتقول دعوة تفيدك. هذا الاستثناء؟ لا، هذا التالفون، أما الاستثناء حاجه أخرى، أنت أمامي الآن، لأن الله فرض استثناءً على القانون، وجعل الاستثناء قانونا، أنت مرهون في استثناء، حياتك ليست ممكنة بغير الاستثناء. آبي. إيه نعم، لولا الاسثناء لكنت في البحر طعاما للأسماك. كيفاش؟ اسمع يا سيدي.

الأجسام تتمدّد بالحرارة وتنكمش بالبرودة، هذا قانون، ولكن هناك استثناء رحمنا به الله لينقذ حياتنا. كلام كبير، يحتاج كاس آخر ليموناظا، بالله ليموناظا مع طابع ثلج، يرحم بوك يا غالي، وكاس ماء، تزيد تشرب حاجه؟ طابع ثلج، عاد قتلك هذا القانون له استثناء، الذي هو الماء، منذ 3 أيام ونحن نتحدث عن خصائص الماء، القانون ينعكس مع الماء حول درجة الصفر. هاو جابلك طابع ثلج، آش باش تعمل بيه؟ ارميه في كاس الماء. ارميناه. هل رأيت أن الثلج يعوم فوق سطح الماء، ولم ينزل إلى أسفل، إذن كثافته أقل من كثافة الماء، لأنه عند البرودة يتمدد على عكس القانون الذي عناه سعيد صالح في مدرسة المشاغبين، ولذلك عندما تضع قارورة ماء مغلقة في الثلاجة، يبرد الماء، ويزيد حجمه، ويكسر القارورة، كما في الصورة الأولى. هذه فهمتها، وما دخل ذلك بإنقاذ حياتي، وياكلني الحوت؟

انظر إلى الصورة الثانية. ملّى دب يا سيدي! قالك يسمّوه “ملك القطب الشمالي”. هو ملك على ربع الكرة الأرضية، وأنت عسّاس في سوق الزوايل، يا ولدي ركّز لي على الماء والثلج، قالو ملك ووزير. تعرف، البارح قدامي في السوق، تباع ثور بـ 3 ملاين. يا ولدي شفت الثلج يعوم فوق الماء؟ قالك الجمل يعرف يعوم زاده، البارح … اسكت، اسكت، رجعلي للزوايل الراجل، ماذا يقع لو كان الثلج أثقل من الماء؟ ينزل إلى القاع. صحيح، وبالتالي يرتفع الماء، ويفيض القطبان الشمالي والجنوبي، ويعمّ الماء كوكب الأرض، ويعلو مترين على مستوى الماء الحالي، أنت تسكن في المهدية؟ إي نعم، مني للبحر. لو ارتفع الماء مترين، ماذا يقع لك؟ تلقاني في البحر، في لقاء مباشر مع سمك القرش، لقاء قصير يعني. زد على ذلك، يموت البحر لأن ثروة البحر في نباتاته في قاعه، إذا نزل الثلج إلى الأسفل تموت الكائنات الحية. هذا الكل نتيجة أن طابع الثلج يعوم فوق الليموناظا، أنا ظنيت أن طابع الثلج يبنّن الليموناظا، وهو أنقذ حياتي. هل رأيت أن الله، سبحانه، خلق القانون وخلق الاستثناء ليستقيم الكون وتعيش الكائنات؟ جعل من القانون حياةً، ومن نقْض القانون حياةً. سبحانه! ما قدرناه حق قدره. كانت هذه الحلقة الثالثة من خصائص الماء التي بدونها لا نحيى. سبحان القائل “وَجَعَلْنَا مِنَ الْمَاءِ كُلَّ شَيْءٍ حَيٍّ ۖ أَفَلَا يُؤْمِنُونَ”. اللهم بك أمنا، فلا تجعلنا ممن شملهم قولك: “وَمَا قَدَرُوا اللَّهَ حَقَّ قَدْرِهِ”. وإلى لقاء قادم، استودعكم الله الذي لا تضيع ودائعه.

شاهد أيضاً

الحريّة من جديد… عن الحرية والفنّ والأخلاق

نور الدين الغيلوفي 1. من مزايا الثورة أنّ المجتمع صار قادرا على البوح بأسراره وفضح ...

اترك رد