جماعة ثورة البرويطة… 3 أنواع
“البعرة تدل على البعير والأثر يدل على المسير”يا سيدي ما يمشيش مخك لبعيد وتبدا تتخيل… نجيك direct لجوهر الموضوع إلي هو ما نوع هاك لعباد إلي ساعات ما تصدقش الي هوما عندهم عقل ميزهم بيه العالي سبحانو على الحيوانات وباقي الكائنات…
طيب
البحث متاعي تراوح على مدى اسبوعين اقتفي أثر جماعة ثورة البرويطة… كل وين نلقى واحد يعلق أو يلمح على الثورة… بثورة البرويطة إلا واقتفي اثره على الفاسبوك وكان عندو تويتر ونحط اسمو على الشيخ جوجل الحاصل نبربشو تبربيش نحب نعرفو أشكون هذا…
منطولش عليكم لقيتهم 3 أنواع يعني قسمتهم على 3 مجموعات كبيرة تشبه لبعضها إلى حد كبير:
النوع الأول
ناس وأكثرهم بنات يعني أناثي لا علاقة جملة بالسياسة ولا يفقهون أصل اش معناها سياسة يعني مثلا تلقاها مبرتاجية: النهضة دخلت للوظيفة العمومية 300 ألف متمتع بالعفو التشريعي العام.. يعني هي صدقت 300 ألف واحد نهضاوي دخلوا للوظيفة العمومية أو تلقاها مبرتاجية أملاك جماعة النهضة بالعقارات والسفن والسيارات والفنادق واليخوت والضيعات وحتى الجواري. وتكتب سهام بن صدرين في عوض بنسدرين تتمقعر يالا يالا.. أو أن المنصف المرزوقي عميل لجهات أجنبية حسب وثائق ويكيلكس إلي أصلا هي ما تعرفش اش معناها ويكيلكس من أصلو… وهاذم عادة ما يعجبهمش حتى عمار عمروسية أو عدنان الحاجي أو حتى العباسي رغم أنه ضد النهضة وتلقاهم حاسبين أرواحهم بلدية وعادة تلقى عندهم حقد على أي زوالي وخاصة منظرو موش باهي أو منظرها موش باهي تقريبا يعجبهم أكثر واحد لطفي لعماري…
النوع الثاني
هاذم أكثرهم رجال بداو يحفظو في السياسة بعد 14 جانفي 2011 تلقاهم مشتركين مثلا في صفحة الدردوري أو سيدي لصرم ويبارتاجو ما يكتبه حبيب الراشدي… يحبو بشار وإيران وحزب الله وحفتر والحوار التونسي ويكرهوا شكيب درويش متاع كلام الناس ويفدوا من عبد الفتاح مورو يعتبروه حرباء وعادة تلقاهم سامحوني في الكلمة… “مكبوتين” الجاهل منهم في تقنية الفيسبوك تحصلو بسهولة إلي هو يتبع صفحات جنسية وحسابات جنسية.
النوع الثالث
اساتذة أو طلبة أو يعني دعنا نقول مثقفين او نخبة… هاذم قلة بصراحة تلقاهم يسارين يبخرو بحاجة اسمها النهضة وزادة يزرقو للباجي وللنداء وخاصة حافظ…
طيب كل ثلاثة أنواع هاذم يشتركوا في:
– كره الجزيرة
– كره النهضة بشكل إستئصالي
– يحبو حفتر
– يحبو السيسي موش على خاطر يتحب على خاطر إستأصل الاخوان.
– مذابيهم النهضة تنقرض جملة حتى بحرب ودماء وأشلاء.
– سكارجية حتى الي موش مصور بالبيرة في الفيسبوك يشجع الزطلة.
– ميالين إلى العلاقات الجنسية بنوعيها.
– يبرتاجي أي حاجة توسخ النهضة أو المرزوقي حتى كان لا يقبلها عقل أصلا.
– أكثر نساء المجموعات الثلاث مطلقات.
– يحبو ترامب والله زعمة زعمة جاي باش يقضي على النهضة واخواتها
نعرف إلي ثما أشكون منكم يلقى روحو بالضبط ضمن أحد المجموعات الثلاث أما الله غالب هذاكة وجهك اش بش نعملك…
هذا شق من الشعب التونسي مازال البحث في الجمعتين الجايين وسأتتبع أثر جماعة راشد لخياري لمدة جمعتين واقتفي اثرهم…
في الأخير “البعرة تدل على البعير والأثر يدل على المسير…