الأربعاء , 14 نوفمبر 2018
الرئيسية / تدوينات تونسية / خدّموا الماكينة، شباها حابسة ؟

خدّموا الماكينة، شباها حابسة ؟

الحبيب حمام

المغدور محمد الزواري، رحمه الله، عينو عورى؟ رجلو عوجى؟عايش على الكريدي؟ واكل رزق اليتامى؟ شنوّه ناقصو؟ لا إضراب عام، ولا تلافز تشرڨع، ولا جنازه مليونية؟ وزيد خارجة من الجامع؟ لاش موش من دار الثقافة؟ أو من السينيما؟ آش ناقصو؟ تي وينو الاتحاد؟ اغتيال مشرشح، بو دورو! شنيه ها الڨينيا؟

شنيّه الحكاية؟ سخّنوا لينا الجوّ، يهديكم، عنّا برشه على الاغتيالات. خدّموا الماكينة، شباها حابسة؟ تي ويني الموسيقى: يا غنوشي يا سفاح، يا قتال الأرواح؟ تي ويني الحكومة فاشلة، ولازم ترحل؟ تي وينو اعتصام الرحيل؟ حط الكورون (courant)، خدم الماكينة، ديماري (démarre) يهديك. اغتيال مَسّوس! زيد الملح. صب الزيت، شبيه شايح؟ تي حرّك الماكلة لصقت. تي خلّط السلعة يا خدّام، تي دوّر يا بناي المعلقة في سطل البغلي باش تليّق، تي فرطس من غادي، دوّر الفرطاسة ورش الماء. تي أعجن الحكاية يا عجان.

تي وينو وزير الداخلية اللي قالوا متورّط في الاغتيال؟ تي وينو متاع قرطاج اللي ما حماش المغدور؟ تي وينو خو سمير بالطيب؟ تي وينهم الاستقصائيون؟ تي ويني فرانسا اللي المفروض تعطي الوراق لمرتو وولادو؟ تي وينو المعتمد؟ اللي ما قتل حد؟ قالك اغتيال مذرّح، موش سينيي (signé)، حاجتنا باغتيال لاكوست وإلا نايك. رحم الله الفقيد، وتعسا للمتاجرين بالدماء.

شاهد أيضاً

ماشي ننتحر !!!

الحبيب حمام • شتعمل غادي؟ وين ماشي؟ ـ ماشي ننتحر. • علاه تنتحر؟ الدنيا حلوّة، ...

لماذا الحسين وأمثاله كثر؟

الحبيب حمام قتِل عظماء عبر التاريخ الإسلامي: الفاروق وهو يؤم الناس في صلاة الفجر (قتله ...