اليوم أنا فخور بثورة البرويطة
ماهر العباسي
أنا إسمي ماهر العباسي تولدت في الڤصرين وقريت فيها وفي منزل تميم وتوزر وسليانة وتونس والسيزيام نجحت مالـ100 الأولين في الجمهورية وقريت في المعهد النموذجي بورڤيبة وقريت في كلية الطب ووليت طبيب مختص وعمري 30 سنة خاطر عمري مادوبلت وخدمت في فرنسا وهولاندا وايطاليا واسبانيا وكوبا والبرازيل والشيلي والأوروغواي وترينيداد وتوباغو وجزر المالوين وعامل مشروع فلاحي مع خواتي وعامل مشروع متاع أثاث أنا وخويا نخدمو في 40 عايلة…
واليوم أنا فخور بثورة البرويطة الي خلات الإسلامي واليساري والنقابي والقومي والشيوعي والملحد والكافر والسلفي يجيو يحكيو على عذابهم وقت انا كنت شايخ ونقرا وننجح..
أنا فخور انو الناس هذومة مكنتهم ثورة البرويطة انهم يحكيو بحرية ويبكيو بحرية ويبكيونا بحرية ويوجعونا بحرية…
انا فخور بيهم ونحبهم ونحترمهم ونبوسهم من ريوسهم… انتوما خير منا واشرف منا وتاج فوق من ريوسنا…
والناس الي تتمقعر عليكم على أساس انتوما تعملو في الشعبوية وهوما مهفات وذكيين وناجحين… البريمة فيهم يجيني أنا ويحكي معايا ويحاججني ويردها علي ان استطاع… هاني نستنى فيكم البريمة يقدم.