الأحد ، 19 نوفمبر 2017
الرئيسية / تدوينات / تدوينات ساخرة / بصراحة منذ ذهاب الترويكا فسدت السّياسة و أصابها الكساد التامّ

بصراحة منذ ذهاب الترويكا فسدت السّياسة و أصابها الكساد التامّ

نضال السالمي

مشتاق ترجع النهضة للحكم ولو في الأحلام : توحّشت الأفلام متاع اليسار من نوع.. خالتي مباركة و قفّة الزوّالي.. وهاك اللّاوي..

مشتاق لدموع الحداثيّين متاع التقدميّة ولا لا للرجعية.. ونبكي عليك بالدم يا تونس..

بصراحة توحّشت ترجع النهضة للسّلطة خلّي الدّولاب يدور من جديد.. وتبدا المظاهرات والإعتصامات.. ويغادروا النوّاب جلسات الحوار ويقدّموا إستقالاتهم زعمة زعمة يناضلون من أجل تونس…

والواحد يكون يمشي في الشارع تتعدّا قدّامو مسيرة متاع مُناذلي اليسار يغنّون بشراسة : “يا غنوشي يا سفّاح يا قتّال الأرواح”.. يسألهم شنيّة مناسبة المسيرة.. يقولولو : ذكرى سقوط جدار برلين.. فيسير معهم ضاحكا على الجوّ ويغنّي معهم وفي قلبه يقول : من أيّة مصحّة نفسيّة هرب هؤلاء.. ؟؟

بصراحة.. كُنّا في جو سياسي كبير.. ويبدا الهوكش في الفايسبوك وفي المقاهي والشوارع ومؤسسات العمل لا يتكلّمون إلّا عن إرتفاع الأسعار وآنهيار الإقتصاد وضياع البلاد.. وأنا نبدا باهت في الوطنيّة العجيبة منين جات لأناس أعرف جدّا جدّا أنّهم الأبعد عن الوطنيّة..

جوّ كبيير… وفي الليل تبدا البرامج متاع زعماء الثورة معز بن غربية والورتاني وغيرهم.. ويبدا شحن النّاس بالأكاذيب والشّبهات.. وهاك القلابس.. هاك القلابس.. وهاك الخبراء متاع كلّ شي : إقتصاد وسياسة وإرهاب.. إلخ.. وهاك الإضرابات العامّة متاع الإتحاد.. ههههه

وتنتشر الإشاعات : هاو سمير ديلو عندو يخت في البحر.. المكّي عندو معمل ياجور.. الجبالي ملك نص سوسة… ومحرزيّة جاني واحد يحلف أنّها تملك نصّ قرمبالية فناقشته إلى حدود إتّفاقي معه أنّها تملك ربع قرمبالية بشوارعها وناسها ومصانعها وسياراتها فقط (كنتُ أسخر من عقله طبعا)… والغنوشي عندو علاقة بالبغدادي وهو سبب الإرهاب العالمي… إلخ

خسارة.. كُنّا في جوّ كبير… عالم من الرّداءة والإنحطاط والشّعوذة : إنتظاري الوحيد هو يوم القيامة.. نحبّ ربّي يكرمني بكُرسي ونقعد نتفرّج في الناس المشاركين في ذاك الإفك والتّآمر الرّهيب كيف سيُحاسبون… ليس لي إنتظار آخر.

  • ملاحظة : هذا الكلام ليس دفاع عن النهضة بل عن العقلانية… لأنّكَ أيّها المشعوذ كنتَ تُناذِل ضدّ النهضة بشراسة وهذا حقّك لكنّ الظّروف اليوم ومنذ خروج النهضة أسوأ ألف مرّة لكنّنا نراك أخرس وعاطي للذلّ كارو وماعادش يهمّك في البلاد.. شفت يا مْدَكّْ كي لعبو بيك وخلّوك تعوم في النّاشح… وليدي كي مصطّك وما تفهمش في السياسة : آآش مدخّلك في مداخل صعيبة عليك ؟؟؟

شاهد أيضاً

كيفاش تكون سياسي من الجيل الأول

ذاكر اللاهيذب 1. تعمل أيدين وساقين وتدخل في حكومة بشتى الطرق. 2. تظهر فيما كتب ...

اترك رد