تدوينات تونسية

يكملو يدخلوها في حيط… على قاعدة صحيحة

مالك بن عمر

شفتو الفضايح متاع نداء تونس ؟ شفتو فضايح السبسي ؟ شفتو البلاد وين خلطت بعد عامين من الانتخابات التشريعية ؟؟ شفتوه هذا الكل ؟ يمشيش في بالكم إلي انتخبوا النداء نادمين ؟؟ والي انتخبوا السبسي قاعدين يقولو ما ابهمنا وقداشنا مصطكين وملا عملة عملناها في رواحنا وفي البلاد ؟؟ يمشيش في بالكم هذا الكل ؟؟ صدقوني ولا يهمهم… آخر اهتماماتهم تونس والبلاد آش قاعد يصير فيها.. ماو الترويكا خرجت من الحكم.. والمرزوقي رتاحو منو… سي بون… انتهت المهمة.. وانتهت الوطنية.. وانتهى عهد “نبكي عليك بالدم يا تونس”…
.
والحفنة إلّي مازالو يتبعوا في الوضع… تجي تحكي معاه على رداءة الوضع في عهد البجبوج.. يقلك كلو من النهضة… ماو النهضة مازالت في الحكم وقاعدة تعرقل في الحكومة… يعني مللخر، لازم تفهموا مليح العقلية البجبوجية… عقلية تصدّق كل إشاعة تخرج على أي واحد جابتو الثورة… مهما تكون الاشاعة تافهة وغبية… يصدقها ويحكيها وينشرها..
.
في المرزوقي كلى بـ 60 مليون حوت في الشهر.. في ديلو عندو يخت بمليار… وحمادي اجبالي عندو اوتيل بـ 10 مليارات… وفي الاف المليارات مشات من الخزينة لجماعة العفو التشريعي العام… والمرزوقي قابل ابو عياض في القصر… و… و عندهم قدرة عجيبة على استيعاب التفاهات والأكاذيب وتصديقها وتحويلها إلى أخبار… هاذم إلي نحكي عليهم توانسة… مش من المريخ… مليون وسبعمائة ألف تونسي دخلوا الخلوة واختارو الباجي باش يحكم تونس… المشكل أنهم مش مستعدين يغيروا أفكارهم ويفيقو على رواحهم… توة يرقدو… يشيخو… يلعبو… ووقت الانتخابات الجاية يفيقولنا باش يعاودو نفس المعبوكة متاع الحداثة والمكتسبات وبورقيبة وضد الظلامية ويكملو يدخلوها في حيط… على قاعدة صحيحة.
#المستقبل_صعيب

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock