تدوينات تونسية

مشكلتك مع بلحسن حلّها ساهل برشه : سكّر التّلفزة!

عبد اللطيف علوي
الجماعة اللّي مصدومين كي شافوا بلحسن، اللّطف عليكم من الصّدمة، آما بربّي وسّعوا بالكم شويّة وجاوبوني علاش مصدومين؟
اللّي يسمعكم هكّه يقول صفّيتوا حساباتكم مع الحيتان والدينصورات السمينة اللّي عندكم الكلّ وغايظكم كيفاش ما نجّمتوش توصلولوا هو في جزر الهولولولو؟؟
ياخي قدّاش ثمّة توّة من بلحسن طرابلسي عايشين بينكم وأحذيتهم فوق رقابكم، وتعرفوهم بالاسم والصّفة وتعرفوا أنّهم هوما اللّي يحرّكوا في الخيوط الكلّ ويفعلون ما هو أخطر بكثير ممّا كان يفعله بلحسن الطّرابلسي… هو لم يكن يتحكّم في المشهد السياسي أو الإعلاميّ ولم يكن هو السبب المباشر في الديكتاتورية، كان حوتا ضخما مستفيدا منها… هاو عندكم اليوم المتسبّب مباشرة في تدمير الثورة وإثارة الفتنة، آش عملتولوا؟ آش عملتوا للفهري وبن غربيّة وكمال اللطيف؟ آش عملتوا للقلال وللشلّي وللقروي ولكلّ الذين كانوا مسؤولين مباشرة، سياسيّا وقانونيّا عن مذابح الشّرف والعدالة وعادوا يسبّوا فيكم وفي ثورتكم وهم بينكم ينظرون في عيونكم ويبصقون على وجوهكم مباشرة وموش عبر السّكايب… ؟
متقلّقين أنّو بلحسن رمز من رموز الفترة السوداء المظلمة؟؟ يا خي موش رجّعتوهم يحكموا الرّموز الكل؟ ياخي حاكمتوا قتلة شهداء الثورة وبردت قلوبكم، وغايظكم الإساءة الرّمزيّة لأرواحهم الطاهرة المطمئنّة، بظهور بلحسن الطرابلسي؟
متقلّقين أنّوا سارق فلوسكم وهارب بيها؟ علاش أنتم كنتو ناوينها باش ترجع، وعملتوا حاجة باش ترجع؟ ضغطتوا على الحكومة كأيّ شعب عندو كرامة باش تضرب على الطاولة وتلاحق المجرمين في كل مكان من العالم لاسترجاع الحقوق ومعاقبة المجرمين؟
هام بحذاكم سارقين فلوسكم ويسبّوا فيكم بيها، ويدخّلوا عليكم في الطرابلسية والصهاينة والجلاّدين الكل لبيوتكم وغرف نومكم… آش عملتولهم يا محامين ويا حقوقيين ويا ثوار ويا مصدومين؟ حتّى شيء… ولاّ تستنّاو فيهم للّي يهربوا هوما زادة ويولّوا رموز رنّانة عند العامّة ويولّي عندهم فساد متلفز يجيب الفرجة ويعمل الأوديمات وبعد يعمل الله ؟…
مختصر الحديث …
صدمتكم من ظهور بلحسن هي صدمة سنمائية افتراضيّة مجازيّة مثل صدمة أيّ ممثل تونسيّ زكيم مبتدئ أمام الكاميرا… الصّدمة كان ممكن يكون لها معنى قبل هذا بكثير… آما توّة خلاص، المثل التونسي معروف، “اللّي شنعت”… تكمّل ليلتها للصّباح…

كانك محروق على تنظيف البلاد من الفسّاد، ستجدهم في كلّ شبر تمدّ إليه يدك، ورّينا الهمّة والوطنيّة… آما مشكلتك اليوم مع بلحسن حلّها ساهل برشه :
سكّر التّلفزة!

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock